1999. Bilbao Antzerkia Dantza-ren lehen edizioa: 1.000 ikusle.
2005. BADen zazpigarren edizioa: 8.000 lagun baino gehiago dantzaz eta antzerkiaz beren formarik garaikide, diziplinarteko eta arriskatuenetan gozatzeko. Jende-marka oso bat, gauza bat besterik adierazi ezin duena: bete-betean asmatu duela, alegia, artea inoiz ez bezala ikusi eta sentitu nahi duten ikusleei zuzendutako programazioak.

2005eko urtea urrats bat gehiago izan zen Bilboko kultura-eskaintzarik berriena sendotze-bidean. Teatre Romea, Animalario, Gelabert Azzopardi, Micomicón eta beste hainbat eta hainbat antzerki-talde eta proposamen, guztira 25 ikuskizun desberdineko multzoarekin, izan ziren BADen azken edizioa osatu zutenak. Orotara 45 ekitaldi eman ziren jaialdiari urteetan zehar elkartu zaizkion sei egoitzetan. Eta iritsi da aldaketa egiteko ordua.

Aldatu ez dena, ordea, Bilbao Antzerkia Dantza-ren bokazioa izan da, hots, adierazpen garaikidearen agertoki bihurtzekoa. Eta helburu hori edizio bakoitzean bete da. Iaz, esate baterako, programazioaren % 95 baino gehiago bizi diren egile garaikideei eskaini zitzaien.
Bestalde, munduko alderdi guztietako taldeen topalekua ere bada BAD. Bere 7. edizioan nazioarteko bost taldek parte hartu zuten. Eta beste bost Espainiako Estatutik etorri ziren. Hori guztia ahaztu gabe, noski, antzerki eta dantza garaikideen jaialdiak dituen beste hainbat balio ere, hala nola Euskal Herriko taldeei eta, batez ere, gure hirian egunez egun dihardutenei laguntzekoa. Horri esker, Bilboko agertokietatik 2005ean pasatutako taldeen erdiak Euskal Herrikoak izan ziren.

Geure buruak zoriontzeko moduko zenbakiak horiek guztiak. Baina ahaztu gabe, betiere, urtez urte landu behar direla. Eta 2006ko honetan, urriaren 27tik azaroaren 5era artean, zortzigarren edizioa.